hai usi shahr ki galiyon mein qayam apna bhi

hai usī shahr kī galiyoñ meñ qayām apnā bhī

ek taḳhtī pe likhā rahtā hai naam apnā bhī

bhīgtī rahtī hai dahlīz kisī bārish meñ

dekhte dekhte bhar jaatā hai jaam apnā bhī

ek to shaam kī be-mehr havā chaltī hai

ek rahtā hai tire kū meñ ḳhirām apnā bhī

koī aahaT tire kūche meñ mahak uThtī hai

jaag uThtā hai tamāshā kisī shaam apnā bhī

ek bādal hī nahīñ bār-e-garāñ se nālāñ

sargirāñ rahtā hai ik zor kalām apnā bhī

koī rasta mire vīrāne meñ aa jaatā hai

usī raste se nikaltā hai davām apnā bhī

ek dil hai ki jise yaad haiñ bāteñ apnī

ek mai hai ki jise raas hai jaam apnā bhī

yūñhī logoñ ke pas-o-pesh meñ chalte chalte

gard uḌtī hai bikhar jaatā hai naam apnā bhī

mubtalā kār-e-shab-o-roz meñ hai shahr 'naved'

aur isī shahr meñ gum hai koī kaam apnā bhī

hai usi shahr ki galiyon mein qayam apna bhi

ek taKHti pe likha rahta hai nam apna bhi

bhigti rahti hai dahliz kisi barish mein

dekhte dekhte bhar jata hai jam apna bhi

ek to sham ki be-mehr hawa chalti hai

ek rahta hai tere ku mein KHiram apna bhi

koi aahaT tere kuche mein mahak uThti hai

jag uThta hai tamasha kisi sham apna bhi

ek baadal hi nahin bar-e-garan se nalan

sargiran rahta hai ek zor kalam apna bhi

koi rasta mere virane mein aa jata hai

usi raste se nikalta hai dawam apna bhi

ek dil hai ki jise yaad hain baaten apni

ek mai hai ki jise ras hai jam apna bhi

yunhi logon ke pas-o-pesh mein chalte chalte

gard uDti hai bikhar jata hai nam apna bhi

mubtala kar-e-shab-o-roz mein hai shahr 'nawed'

aur isi shahr mein gum hai koi kaam apna bhi