hai wahimon ka tamasha yahan wahan dekho

hai vāhimoñ kā tamāshā yahāñ vahāñ dekho

hamāre paas mukammal ḳhudā kahāñ dekho

dil-o-dimāġh ke andar anā kī guuñj suno

balā sī koī lahū meñ ravāñ-davāñ dekho

nafas kā saañp kahāñ zer hone vaalā hai

phir is ke ba.ad koī aur imtihāñ dekho

ab apne ghar ke liye ik na.ī zamīñ socho

zamīñ ke sar pe koī taaza āsmāñ dekho

is ik savāl ke kitne azaab jhel chukā

kuchh aur dard banū aur imtihāñ dekho

guzar ke jaanā hai vahshat ke ek dariyā se

yaqīñ na ho to yahāñ rāsta kahāñ dekho

kahāñ se aa.egī ab raushnī mohabbat kī

bahut dhuāñ hai makānoñ ke darmiyāñ dekho

maiñ be-yaqīn huuñ aisā ki mere hāthoñ meñ

tamām āyateñ sūraj kī rā.egāñ dekho

phaTā huā kisī uryāñ savāl jaisā hai

hamāre sar pe ye rahmat kā sā.ebāñ dekho

nishān ret ke aa.e haiñ mere hisse meñ

nikal gayā hai bahut duur kārvāñ dekho

masīh maut kā paiġhām le ke aayā hai

ab aur kaun bachā.egā merī jaañ dekho

mire hurūf adhūrī uḌaan jaise haiñ

mirā shu.ūr ma.ānī kā āsmāñ dekho

vo ek lamha hayāt-āshnā likho 'ahmad'

vagarna saarī kahānī hī rā.egāñ dekho

hai wahimon ka tamasha yahan wahan dekho

hamare pas mukammal KHuda kahan dekho

dil-o-dimagh ke andar ana ki gunj suno

bala si koi lahu mein rawan-dawan dekho

nafas ka sanp kahan zer hone wala hai

phir is ke baad koi aur imtihan dekho

ab apne ghar ke liye ek nai zamin socho

zamin ke sar pe koi taza aasman dekho

is ek sawal ke kitne azab jhel chuka

kuchh aur dard banu aur imtihan dekho

guzar ke jaana hai wahshat ke ek dariya se

yaqin na ho to yahan rasta kahan dekho

kahan se aaegi ab raushni mohabbat ki

bahut dhuan hai makanon ke darmiyan dekho

main be-yaqin hun aisa ki mere hathon mein

tamam aayaten suraj ki raegan dekho

phaTa hua kisi uryan sawal jaisa hai

hamare sar pe ye rahmat ka saeban dekho

nishan ret ke aae hain mere hisse mein

nikal gaya hai bahut dur karwan dekho

masih maut ka paigham le ke aaya hai

ab aur kaun bachaega meri jaan dekho

mere huruf adhuri uDan jaise hain

mera shuur maani ka aasman dekho

wo ek lamha hayat-ashna likho 'ahmad'

wagarna sari kahani hi raegan dekho