hai wajh-e-tamasha-e-jahan dil-shikani bhi

hai vaj.h-e-tamāshā-e-jahāñ dil-shikanī bhī

manzūr hai ai dost! ye neze kī anī bhī

shādāb daraḳhtoñ ke bhī saa.e haiñ gurezāñ

ik jurm huī merī ġharīb-ul-vatanī bhī

piite hī rahe gardish-e-ayyām ke hāthoñ

sahbā-e-malāmat bhī ġham-e-ta.ana-zanī bhī

sochā thā ki us bazm meñ ḳhāmosh raheñge

mauzū-e-suḳhan ban ke rahī kam-suḳhanī bhī

ai silsila-e-nik.hat-e-gesū ke asīro!

hai ishq meñ ik marhala-e-koh-kanī bhī

vīrān jazīroñ kī tarah ḳhushk haiñ āñkheñ

bekār hai ai dard tirī nāla-zanī bhī

ai nāzish-e-sad-rañg na kar un se taġhāful

hai ḳhāk-nashīnoñ se tirī gul-badanī bhī

hai wajh-e-tamasha-e-jahan dil-shikani bhi

manzur hai ai dost! ye neze ki ani bhi

shadab daraKHton ke bhi sae hain gurezan

ek jurm hui meri gharib-ul-watani bhi

pite hi rahe gardish-e-ayyam ke hathon

sahba-e-malamat bhi gham-e-tana-zani bhi

socha tha ki us bazm mein KHamosh rahenge

mauzu-e-suKHan ban ke rahi kam-suKHani bhi

ai silsila-e-nikhat-e-gesu ke asiro!

hai ishq mein ek marhala-e-koh-kani bhi

viran jaziron ki tarah KHushk hain aankhen

bekar hai ai dard teri nala-zani bhi

ai nazish-e-sad-rang na kar un se taghaful

hai KHak-nashinon se teri gul-badani bhi