ہیں بام و در کے جسم کٹے اور جلے ہوئے

ہیں بام و در کے جسم کٹے اور جلے ہوئے

گلیوں کے پیرہن ہیں لہو میں بھرے ہوئے

جنگل کی رات ہو گئی آبادیوں کی رات

ہیں کنج کنج خوف زدہ جاگتے ہوئے

اے اہل شہر ایسی بھی کیا بے رخی کہ ہم

پردیس تو خوشی سے نہیں تھے گئے ہوئے

میں وہ نہیں رہا کہ یہ وہ شہر ہی نہیں

یار آشنا کہاں کہ ہیں دشمن کھنچے ہوئے

ہم کو بھی تم سے پرسش غم کی امید تھی

دنیا میں تم سے دور کئی حادثے ہوئے

سب غم زدہ ہیں کس پہ گماں کیجے قتل کا

مقتول کے جنازے میں سب ہیں گئے ہوئے

کیسا گلہ کہاں کا تقاضا کہاں سوال

وہ سر سے پاؤں تک ہیں تغافل بنے ہوئے

پھرتے ہو کس کو پوچھتے قیسیؔ کے نام سے

اس شخص کو زمانہ ہوا ہے مرے ہوئے