hain baam-o-dar ke jism kaTe aur jale hue

haiñ bām-o-dar ke jism kaTe aur jale hue

galiyoñ ke pairahan haiñ lahū meñ bhare hue

jangal kī raat ho ga.ī ābādiyoñ kī raat

haiñ kunj-kunj ḳhauf-zada jāgte hue

ai ahl-e-shahr aisī bhī kyā be-ruḳhī ki ham

pardes to ḳhushī se nahīñ the ga.e hue

maiñ vo nahīñ rahā ki ye vo shahr hī nahīñ

yaar āshnā kahāñ ki haiñ dushman khiñche hue

ham ko bhī tum se pursish-e-ġham kī umiid thī

duniyā meñ tum se duur ka.ī hādse hue

sab ġham-zada haiñ kis pe gumāñ kiije qatl kā

maqtūl ke janāze meñ sab haiñ ga.e hue

kaisā gila kahāñ kā taqāzā kahāñ savāl

vo sar se paañv tak haiñ taġhāful bane hue

phirte ho kis ko pūchhte 'qaisī' ke naam se

us shaḳhs ko zamāna huā hai mare hue

hain baam-o-dar ke jism kaTe aur jale hue

galiyon ke pairahan hain lahu mein bhare hue

jangal ki raat ho gai aabaadiyon ki raat

hain kunj-kunj KHauf-zada jagte hue

ai ahl-e-shahr aisi bhi kya be-ruKHi ki hum

pardes to KHushi se nahin the gae hue

main wo nahin raha ki ye wo shahr hi nahin

yar aashna kahan ki hain dushman khinche hue

hum ko bhi tum se pursish-e-gham ki umid thi

duniya mein tum se dur kai hadse hue

sab gham-zada hain kis pe guman kije qatl ka

maqtul ke janaze mein sab hain gae hue

kaisa gila kahan ka taqaza kahan sawal

wo sar se panw tak hain taghaful bane hue

phirte ho kis ko puchhte 'qaisi' ke nam se

us shaKHs ko zamana hua hai mare hue