hain bahut se aashiq-e-dil-gir jama

haiñ bahut se āshiq-e-dil-gīr jam.a

tere tarkash meñ haiñ kitne tiir jam.a

achchhī sūrat se hameñ bhī ishq hai

karte haiñ tasvīr par tasvīr jam.a

kūcha-e-qātil meñ aafat aa ga.ī

jab hue do chaar bhī rahgīr jam.a

yā lagā do aag yā likh do javāb

ho gayā hai daftar-e-tahrīr jam.a

thoḌī thoḌī hī mile us dar kī ḳhaak

chuTkī chuTkī ham kareñ iksīr jam.a

ḳhūn-e-dil kā chashm-e-tar Thekā na le

is se hone kī nahīñ taufīr jam.a

kis tarah yakjā hoñ 'dāġh' apne aziiz

hone detī hī nahīñ taqdīr jam.a

hain bahut se aashiq-e-dil-gir jama

tere tarkash mein hain kitne tir jama

achchhi surat se hamein bhi ishq hai

karte hain taswir par taswir jama

kucha-e-qatil mein aafat aa gai

jab hue do chaar bhi rahgir jama

ya laga do aag ya likh do jawab

ho gaya hai daftar-e-tahrir jama

thoDi thoDi hi mile us dar ki KHak

chuTki chuTki hum karen iksir jama

KHun-e-dil ka chashm-e-tar Theka na le

is se hone ki nahin taufir jama

kis tarah yakja hon 'dagh' apne aziz

hone deti hi nahin taqdir jama