hain bashar mein sifat muTThi bhar

haiñ bashar meñ sifāt muTThī bhar

par nahīñ ḳhvāhishāt muTThī bhar

merī āñkhoñ meñ ḳhvāb lā-mahdūd

mere hisse meñ raat muTThī bhar

āsmāñ se vasī.a mansūbe

aadmī kī hayāt muTThī bhar

dunyavī ilm jānte haiñ sab

māhir-e-dīniyāt muTThī bhar

ziist meñ haiñ masarrateñ lākhoñ

aur haiñ hādsāt muTThī bhar

mas.ale aa.e har ghaḌī darpesh

hal huiiñ mushkilāt muTThī bhar

va.ada imdād kā kareñge sab

vaqt par deñge saath muTThī bhar

ham se ye bhī adā nahīñ hote

farz aur vājibāt muTThī bhar

pyaar iḳhlās ājizī 'anjum'

haiñ tire zevarāt muTThī bhar

hain bashar mein sifat muTThi bhar

par nahin KHwahishat muTThi bhar

meri aankhon mein KHwab la-mahdud

mere hisse mein raat muTThi bhar

aasman se wasia mansube

aadmi ki hayat muTThi bhar

dunyawi ilm jaante hain sab

mahir-e-diniyat muTThi bhar

zist mein hain masarraten lakhon

aur hain hadsat muTThi bhar

masale aae har ghaDi darpesh

hal huin mushkilat muTThi bhar

wada imdad ka karenge sab

waqt par denge sath muTThi bhar

hum se ye bhi ada nahin hote

farz aur wajibaat muTThi bhar

pyar iKHlas aajizi 'anjum'

hain tere zewaraat muTThi bhar