ہیں دن جو خوف کے سائے میں رات سہمی ہوئی

ہیں دن جو خوف کے سائے میں رات سہمی ہوئی

دکھائی دینے لگی کائنات سہمی ہوئی

قدم قدم پہ ہے اک ایسی موت کا سایا

گھروں میں رہ کے بھی ہے یہ حیات سہمی ہوئی

یہاں ہوں آج رعایا کہ ظل سبحانی

کوئی نہیں ہے نہ ہو جس کی ذات سہمی ہوئی

سلے ہوئے تو نہیں ہیں ہمارے ہونٹ مگر

جو بولتے ہیں نکلتی ہے بات سہمی ہوئی

بہا رہی ہے ندامت کچھ اس طرح آنسو

کہ جیسے نکلی ہو کوئی برات سہمی ہوئی

گناہ دنیا میں ہر سو ہیں سر اٹھائے ہوئے

کہیں کھڑی ہے کنارے نجات سہمی ہوئی

کہاں سے آئیں گے شاہدؔ خوشی کے مترادف

ہے لفظ لفظ ہماری لغات سہمی ہوئی