hain jitni parten yahan aasman mein shamil

haiñ jitnī parteñ yahāñ āsmān meñ shāmil

sabhī huiiñ mirī had kī uḌaan meñ shāmil

baḌhā hai shahr meñ rutba zarā hamārā bhī

hue haiñ jaise ham un ke bayān meñ shāmil

uchhāl yuuñ hī nahīñ baḌh ga.ī hai lahroñ kī

nadī kā zor bhī hai kuchh Dhalān meñ shāmil

dhuāñ ġhubār parinde tapish ghuTan ḳhushbū

haiñ bojh kitne havā kī thakān meñ shāmil

thiiñ qist jitnī bhī ḳhvāboñ kī be-hisāb paḌī

kiyā hai niiñd ne sab ko lagān meñ shāmil

sunā hai naam se tere haiñ bikte afsāne

mujhe bhī kar le kabhī dāstān meñ shāmil

zarā sī dostī kī ham se qāfiyoñ ne kiyā

kiyā ġhazal ne hameñ ḳhāndān meñ shāmil

hain jitni parten yahan aasman mein shamil

sabhi huin meri had ki uDan mein shamil

baDha hai shahr mein rutba zara hamara bhi

hue hain jaise hum un ke bayan mein shamil

uchhaal yun hi nahin baDh gai hai lahron ki

nadi ka zor bhi hai kuchh Dhalan mein shamil

dhuan ghubar parinde tapish ghuTan KHushbu

hain bojh kitne hawa ki thakan mein shamil

thin qist jitni bhi KHwabon ki be-hisab paDi

kiya hai nind ne sab ko lagan mein shamil

suna hai nam se tere hain bikte afsane

mujhe bhi kar le kabhi dastan mein shamil

zara si dosti ki hum se qafiyon ne kiya

kiya ghazal ne hamein KHandan mein shamil