hain mere wajud mein maujzan meri ulfaton ki nishaniyan

haiñ mire vajūd meñ maujzan mirī ulfatoñ kī nishāniyāñ

na huiiñ nasīb jo qurbateñ unhīñ qurbatoñ kī nishāniyāñ

thakī haarī shakl niDhāl sī kisī imtihāñ ke savāl sī

mire jism-o-jān pe sabt haiñ tirī furqatoñ kī nishāniyāñ

kabhī āñkheñ ġhaiz se tar-ba-tar kabhī la.an-ta.an zabān par

mujhe merī jaañ se aziiz haiñ tirī nafratoñ kī nishāniyāñ

ho vo bū-e-gul ki ho rāgnī ho vo ābshār ki chāñdnī

haiñ qadam qadam pe sajī huiiñ tirī nuz.hatoñ kī nishāniyāñ

ka.ī baar roz ka.ī jagah mirī ruuh paḌhtī hai fātiha

mire puure jism meñ dafn haiñ mirī hasratoñ kī nishāniyāñ

kahīñ nāchtī huiiñ mastiyāñ kahīñ bhuuk se haiñ laḌā.iyāñ

kahīñ daulatoñ ke muzāhire kahīñ ġhurbatoñ kī nishāniyāñ

vo zamīn ho ki ho āsmāñ vo pahāḌ hoñ ki hoñ vādiyāñ

haiñ chahār samt mire ḳhudā tirī rahmatoñ kī nishāniyāñ

hain mere wajud mein maujzan meri ulfaton ki nishaniyan

na huin nasib jo qurbaten unhin qurbaton ki nishaniyan

thaki haari shakl niDhaal si kisi imtihan ke sawal si

mere jism-o-jaan pe sabt hain teri furqaton ki nishaniyan

kabhi aankhen ghaiz se tar-ba-tar kabhi lan-tan zaban par

mujhe meri jaan se aziz hain teri nafraton ki nishaniyan

ho wo bu-e-gul ki ho ragni ho wo aabshaar ki chandni

hain qadam qadam pe saji huin teri nuzhaton ki nishaniyan

kai bar roz kai jagah meri ruh paDhti hai fatiha

mere pure jism mein dafn hain meri hasraton ki nishaniyan

kahin nachti huin mastiyan kahin bhuk se hain laDaiyan

kahin daulaton ke muzahire kahin ghurbaton ki nishaniyan

wo zamin ho ki ho aasman wo pahaD hon ki hon wadiyan

hain chahaar samt mere KHuda teri rahmaton ki nishaniyan