hain muntazir aankhen koi ek KHwab to aae

haiñ muntazir āñkheñ koī ik ḳhvāb to aa.e

sāhil nahīñ aatā hai to girdāb to aa.e

sahrā ke ḳhad-o-ḳhāl se khelūñ maiñ kahāñ tak

raste meñ koī ḳhitta-e-shādāb to aa.e

kyā fikr jo paikar se vo mahtāb nahīñ hai

pahne hue pairāhan-e-mahtāb to aa.e

aflāk ye kahte haiñ huī bazm mukammal

kahte haiñ sitāre mirā mahtāb to aa.e

jo vaqt kī likkhī huī tahrīr miTā de

bāzār meñ aisā koī tezāb to aa.e

jin logoñ ne dekhī nahīñ Duubī huī bastī

vo log duā karte haiñ sailāb to aa.e

suntā huuñ ki har shaḳhs paḌhe us kā qasīda

ik baar shanāvar vo tah-e-āb to aa.e

aa jā.eñge aahū bhī jhukā.e hue gardan

shamshīr-e-hunar meñ tirī kuchh aab to aa.e

kis kaam ke the pheñk diye dasht-e-ziyāñ meñ

hāthoñ meñ ka.ī gauhar-e-nāyāb to aa.e

sūkhe hue hoñT apne dikhā deñge use ham

pahle hameñ karne koī sairāb to aa.e

har shaḳhs se miltā hai na.e kunj-e-nafas meñ

'yāvar' ko mulāqāt ke ādāb to aa.e

hain muntazir aankhen koi ek KHwab to aae

sahil nahin aata hai to girdab to aae

sahra ke KHad-o-KHal se khelun main kahan tak

raste mein koi KHitta-e-shadab to aae

kya fikr jo paikar se wo mahtab nahin hai

pahne hue pairahan-e-mahtab to aae

aflak ye kahte hain hui bazm mukammal

kahte hain sitare mera mahtab to aae

jo waqt ki likkhi hui tahrir miTa de

bazar mein aisa koi tezab to aae

jin logon ne dekhi nahin Dubi hui basti

wo log dua karte hain sailab to aae

sunta hun ki har shaKHs paDhe us ka qasida

ek bar shanawar wo tah-e-ab to aae

aa jaenge aahu bhi jhukae hue gardan

shamshir-e-hunar mein teri kuchh aab to aae

kis kaam ke the phenk diye dasht-e-ziyan mein

hathon mein kai gauhar-e-nayab to aae

sukhe hue honT apne dikha denge use hum

pahle hamein karne koi sairab to aae

har shaKHs se milta hai nae kunj-e-nafas mein

'yawar' ko mulaqat ke aadab to aae