hain sare jurm jab apne hisab mein likhna

haiñ saare jurm jab apne hisāb meñ likhnā

savāl ye hai ki phir kyā javāb meñ likhnā

burā sahī maiñ pa niyyat burī nahīñ merī

mire gunāh bhī kār-e-savāb meñ likhnā

rahā sahā bhī sahārā na TuuT jaa.e kahīñ

na aisī baat koī iztirāb meñ likhnā

ye ittifāq ki māñgā thā un se jin kā javāb

vo bāteñ bhuul ga.e vo javāb meñ likhnā

havā-mahal meñ sajāyā thā tum ne jab darbār

koī ġharīb bhī aayā thā ḳhvāb meñ likhnā

na bhūlnā ki 'umar' haiñ ye dostoñ ke hisāb

kabhī na paḌhnā jo dil kī kitāb meñ likhnā

hain sare jurm jab apne hisab mein likhna

sawal ye hai ki phir kya jawab mein likhna

bura sahi main pa niyyat buri nahin meri

mere gunah bhi kar-e-sawab mein likhna

raha saha bhi sahaara na TuT jae kahin

na aisi baat koi iztirab mein likhna

ye ittifaq ki manga tha un se jin ka jawab

wo baaten bhul gae wo jawab mein likhna

hawa-mahal mein sajaya tha tum ne jab darbar

koi gharib bhi aaya tha KHwab mein likhna

na bhulna ki 'umar' hain ye doston ke hisab

kabhi na paDhna jo dil ki kitab mein likhna