hain siyah abr ke sae tere gesu ki tarah

haiñ siyah abr ke saa.e tire gesū kī tarah

jalva-gar qaus-e-quzah hai tire abrū kī tarah

zehn-o-dil hosh-o-ḳhirad fahm-o-shu.ūr-o-idrāk

le ga.ī un kī nazar luuT ke jaadū kī tarah

maiñ to kuchh bhī nahīñ zulmat-kada-e-hastī meñ

huuñ faqat ek chamakte hue jugnū kī tarah

māh-e-nau kā nazar aatā hai falak par jo dimāġh

hū-bahū jalvagarī hai tirī abrū kī tarah

jaane kyā TūTtā rahtā hai mire siine meñ

guuñj aatī hai chhanakte hue ghuñgrū kī tarah

ik na ik din mujhe mahsūs kiyā jaanā hai

maiñ chaman meñ huuñ bikhartī huī ḳhushbū kī tarah

vaqt kī aañkh se kyā jāniye kab gir jā.ūñ

maiñ huuñ palkoñ pe larazte hue aañsū kī tarah

tum ne dekhā to lagā tum ko divāna 'sājid'

ham ne dekhā to dikhā.ī diyā sādhū kī tarah

hain siyah abr ke sae tere gesu ki tarah

jalwa-gar qaus-e-quzah hai tere abru ki tarah

zehn-o-dil hosh-o-KHirad fahm-o-shuur-o-idrak

le gai un ki nazar luT ke jadu ki tarah

main to kuchh bhi nahin zulmat-kada-e-hasti mein

hun faqat ek chamakte hue jugnu ki tarah

mah-e-nau ka nazar aata hai falak par jo dimagh

hu-bahu jalwagari hai teri abru ki tarah

jaane kya TuTta rahta hai mere sine mein

gunj aati hai chhanakte hue ghungru ki tarah

ek na ek din mujhe mahsus kiya jaana hai

main chaman mein hun bikharti hui KHushbu ki tarah

waqt ki aankh se kya jaaniye kab gir jaun

main hun palkon pe larazte hue aansu ki tarah

tum ne dekha to laga tum ko diwana 'sajid'

hum ne dekha to dikhai diya sadhu ki tarah