hain tegh-e-naz-e-yar ke bismil alag alag

haiñ teġh-e-nāz-e-yār ke bismil alag alag

siine meñ haiñ tapāñ jigar-o-dil alag alag

qātil to rashk dekh zarā apne kushtoñ kā

maqtal meñ bhī taḌapte haiñ bismil alag alag

kyā intizām hai mire lailā-jamāl kā

majnūñ ravāñ haiñ sab pas-e-mahmil alag alag

dekho bashar meñ san.at-e-ḳhallāq-e-rozgār

sab ek haiñ magar hai shamā.il alag alag

farmāte haiñ milāp kā kartā huuñ jab savāl

tū baat karne ke nahīñ qābil alag alag

ik shefta hai zulf kā ik mubtalā-e-ruḳh

haiñ shaiḳh-o-barhaman tire qaa.il alag alag

mere tumhāre bulbul-o-gul muñh chaḌheñge kyā

donoñ ko kar chukā huuñ maiñ qaa.il alag alag

makr-o-nifāq 'ishq se muddat talak rahā

maiñ dil se aur mujh se mirā dil alag alag

tā ho tamīz lazzat-e-bādām-o-shahd meñ

bosoñ kā chashm-o-lab ke huuñ saa.il alag alag

kis kis ko duuñ maiñ saḳht musībat meñ jaan hai

ruḳhsār-o-zulf māñgte haiñ dil alag alag

kyā mehr-o-māh kyā gul-o-shamshād aa.ina

sab ho chuke haiñ tere muqābil alag alag

yaktā tū vo hai momin-o-kāfir yahūd-o-gabr

vahdat ke tere sab haiñ ye qaa.il alag alag

pā-e-nigāh-e-ahl-e-nazar ke paḌe haiñ niil

ruḳhsār-e-nāznīñ pe nahīñ til alag alag

aage to saath rahte the ham haala saañ par ab

rahtā hai ham se vo mah-e-kāmil alag alag

andāz-o-nāz-o-ġhamza-o-shoḳhī-o-kajravī

haiñ ek mere dam ke ye qātil alag alag

qabze pe haath rakh ke 'qalaq' ne milā.ī aañkh

kal har raqīb se sar-e-mahfil alag alag

hain tegh-e-naz-e-yar ke bismil alag alag

sine mein hain tapan jigar-o-dil alag alag

qatil to rashk dekh zara apne kushton ka

maqtal mein bhi taDapte hain bismil alag alag

kya intizam hai mere laila-jamal ka

majnun rawan hain sab pas-e-mahmil alag alag

dekho bashar mein sanat-e-KHallaq-e-rozgar

sab ek hain magar hai shamail alag alag

farmate hain milap ka karta hun jab sawal

tu baat karne ke nahin qabil alag alag

ek shefta hai zulf ka ek mubtala-e-ruKH

hain shaiKH-o-barhaman tere qail alag alag

mere tumhaare bulbul-o-gul munh chaDhenge kya

donon ko kar chuka hun main qail alag alag

makr-o-nifaq 'ishq se muddat talak raha

main dil se aur mujh se mera dil alag alag

ta ho tamiz lazzat-e-baadam-o-shahd mein

boson ka chashm-o-lab ke hun sail alag alag

kis kis ko dun main saKHt musibat mein jaan hai

ruKHsar-o-zulf mangte hain dil alag alag

kya mehr-o-mah kya gul-o-shamshad aaina

sab ho chuke hain tere muqabil alag alag

yakta tu wo hai momin-o-kafir yahud-o-gabr

wahdat ke tere sab hain ye qail alag alag

pa-e-nigah-e-ahl-e-nazar ke paDe hain nil

ruKHsar-e-naznin pe nahin til alag alag

aage to sath rahte the hum haala san par ab

rahta hai hum se wo mah-e-kaamil alag alag

andaz-o-naz-o-ghamza-o-shoKHi-o-kajrawi

hain ek mere dam ke ye qatil alag alag

qabze pe hath rakh ke 'qalaq' ne milai aankh

kal har raqib se sar-e-mahfil alag alag