ہیں یہ جنجال سارے جی کے ساتھ

ہیں یہ جنجال سارے جی کے ساتھ

موت ہر دم ہے زندگی کے ساتھ

بے وفائی وفا کے بدلے میں

ہوتی آئی ہے آدمی کے ساتھ

فکر نان شبینہ ہے بے کار

رزق آتا ہے آدمی کے ساتھ

پاس تھا زر تو کوئی عیب نہ تھا

سب عیوب آئے بے زری کے ساتھ

اب تو سوہان روح اداسی ہے

دل لگی تو تھی دل لگی کے ساتھ

کس قدر حسرت سلوک و درد

بے کسی کو ہے بے کسی کے ساتھ

کاٹ ہی لیں گے زندگی کا سفر

رنج کے ساتھ کچھ خوشی کے ساتھ

اب بھی دیر و حرم کو جاتا ہوں

لیکن انداز بے دلی کے ساتھ

عشق میں رشک بھی گماں بھی ہے

واسطہ کیا تمہیں کسی کے ساتھ

جام پر جام کیجیے نوش آپ

لیکن آداب میکشی کے ساتھ

اور بھی ہیں گناہ دنیا میں

اس قدر بیر مے کشی کے ساتھ

بت پرستی ہے کوئی کھیل نہیں

کیجے ایماں کی پختگی کے ساتھ