hairan aankh KHwab-nigar baad mein hui

hairān aañkh ḳhvāb-nigar baad meñ huī

nannhī sī aarzū thī amar baad meñ huī

kis marz-e-lā-davā ne use kar liyā asiir

ḳhud par to chārāgar kī nazar baad meñ huī

qaid-e-qafas se zindagī pahle huī rihā

aur raushnī sī jānib-e-dar baad meñ huī

kis dasht-e-be-amāñ meñ luTā kārvān-e-shauq

dil ko to hādse kī ḳhabar baad meñ huī

kahte haiñ log us ne ka.ī ghar jalā diye

vo raushnī ki jo mire ghar baad meñ huī

ra.anā.ī chūstī rahī abr-e-bahār kī

ik chob-e-ḳhushk shāḳh-e-samar baad meñ huī

ġham to janam janam se mire saath thā 'sadaf'

lekin ḳhushī sharīk-e-safar baad meñ huī

hairan aankh KHwab-nigar baad mein hui

nannhi si aarzu thi amar baad mein hui

kis marz-e-la-dawa ne use kar liya asir

KHud par to chaaragar ki nazar baad mein hui

qaid-e-qafas se zindagi pahle hui riha

aur raushni si jaanib-e-dar baad mein hui

kis dasht-e-be-aman mein luTa karwan-e-shauq

dil ko to hadse ki KHabar baad mein hui

kahte hain log us ne kai ghar jala diye

wo raushni ki jo mere ghar baad mein hui

ranai chusti rahi abr-e-bahaar ki

ek chob-e-KHushk shaKH-e-samar baad mein hui

gham to janam janam se mere sath tha 'sadaf'

lekin KHushi sharik-e-safar baad mein hui