hairan hai aankh chashm-e-inayat ko kya hua

hairāñ hai aañkh chashm-e-ināyat ko kyā huā

duniyā meñ rasm-o-rāh-e-mohabbat ko kyā huā

maanā ki shahr-e-husn meñ jins-e-vafā nahīñ

lekin jahāñ meñ ishq kī daulat ko kyā huā

aatī hai yaad roz ḳhud aatī nahīñ magar

yārab hamārī shām-e-masarrat ko kyā huā

vaqt-e-vidā' zard huā rang-e-ruḳh agar

rang-o-bahār-e-āriz-e-fitrat ko kyā huā

thī ham ko aql se to na pahle hī kuchh umiid

'nayyar' junūñ ke faiz-o-karāmāt ko kyā huā

hairan hai aankh chashm-e-inayat ko kya hua

duniya mein rasm-o-rah-e-mohabbat ko kya hua

mana ki shahr-e-husn mein jins-e-wafa nahin

lekin jahan mein ishq ki daulat ko kya hua

aati hai yaad roz KHud aati nahin magar

yarab hamari sham-e-masarrat ko kya hua

waqt-e-wida' zard hua rang-e-ruKH agar

rang-o-bahaar-e-ariz-e-fitrat ko kya hua

thi hum ko aql se to na pahle hi kuchh umid

'nayyar' junun ke faiz-o-karamat ko kya hua