hairan sara shahr tha jis ki uDan par

hairān saarā shahr thā jis kī uḌaan par

panchhī vo phaḌ phaḌā ke girā sā.ebān par

shāyad usī se zehan kā jañgal mahak uThe

lafzoñ ke gul khilā.iye shāḳh-e-zabān par

kis dil kī raakh juzv-e-rag-e-sañg ho ga.ī

sūraj-mukhī kā phuul khilā hai chaTān par

ik din use zamīñ kī kashish khīñch lā.egī

kab tak rahegā terā ḳhayāl āsmān par

āvāz kī mahak na kabhī qaid ho sakī

pahre lage hazār guloñ kī zabān par

hairan sara shahr tha jis ki uDan par

panchhi wo phaD phaDa ke gira saeban par

shayad usi se zehan ka jangal mahak uThe

lafzon ke gul khilaiye shaKH-e-zaban par

kis dil ki rakh juzw-e-rag-e-sang ho gai

suraj-mukhi ka phul khila hai chaTan par

ek din use zamin ki kashish khinch laegi

kab tak rahega tera KHayal aasman par

aawaz ki mahak na kabhi qaid ho saki

pahre lage hazar gulon ki zaban par