hairat-e-naz baDi der se hairan jaanam

hairat-e-nāz baḌī der se hairāñ jānam

baad muddat jo milī sā.at-e-imkāñ jānam

haiñ bahut aaj bhī taz.īn ke sāmāñ jānam

motiyāñ aur sadaf tār-e-garebāñ jānam

in hī yādoñ meñ hai tafsīr-e-bahārāñ jānam

bāñdh rakhiyo ye haiñ aurāq-e-gulistāñ jānam

jis se tanhā.ī kī tahzīb sañvar jaatī hai

tum hī batlāo mire qurb kā unvāñ jānam

koī to paas huā kartā hai apnoñ kī tarah

raat jab dard se miltī hai mirī jaañ jānam

ḳhūn-e-hasrat meñ Duboyā hai qalam ko maiñ ne

ab to kaT jā.eñge lamhāt-e-pareshāñ jānam

roz khulte haiñ kisī va.ada-e-jānāñ ke baġhair

phuul mausam se nahīñ karte haiñ paimāñ jānam

ham ne girdāb kī pāzeb banā Daalī hai

haath kangan meñ sajī gardish-e-daurāñ jānam

ḳhush-gumāñ lafz meñ ḳhushbū hai tire paikar kī

kitnā pur-kaif tire ḳhat kā hai ehsāñ jānam

mus.haf-e-nūr nazar aa.ī tirī paak jabīñ

terā chehra bhī to hai rashk-e-gulistāñ jānam

hairat-e-naz baDi der se hairan jaanam

baad muddat jo mili saat-e-imkan jaanam

hain bahut aaj bhi tazin ke saman jaanam

motiyan aur sadaf tar-e-gareban jaanam

in hi yaadon mein hai tafsir-e-bahaaran jaanam

bandh rakhiyo ye hain auraq-e-gulistan jaanam

jis se tanhai ki tahzib sanwar jati hai

tum hi batlao mere qurb ka unwan jaanam

koi to pas hua karta hai apnon ki tarah

raat jab dard se milti hai meri jaan jaanam

KHun-e-hasrat mein Duboya hai qalam ko main ne

ab to kaT jaenge lamhat-e-pareshan jaanam

roz khulte hain kisi wada-e-jaanan ke baghair

phul mausam se nahin karte hain paiman jaanam

hum ne girdab ki pazeb bana Dali hai

hath kangan mein saji gardish-e-dauran jaanam

KHush-guman lafz mein KHushbu hai tere paikar ki

kitna pur-kaif tere KHat ka hai ehsan jaanam

mushaf-e-nur nazar aai teri pak jabin

tera chehra bhi to hai rashk-e-gulistan jaanam