حیرت ناز بڑی دیر سے حیراں جانم

حیرت ناز بڑی دیر سے حیراں جانم

بعد مدت جو ملی ساعت امکاں جانم

ہیں بہت آج بھی تزئین کے ساماں جانم

موتیاں اور صدف تار گریباں جانم

ان ہی یادوں میں ہے تفسیر بہاراں جانم

باندھ رکھیو یہ ہیں اوراق گلستاں جانم

جس سے تنہائی کی تہذیب سنور جاتی ہے

تم ہی بتلاؤ مرے قرب کا عنواں جانم

کوئی تو پاس ہوا کرتا ہے اپنوں کی طرح

رات جب درد سے ملتی ہے مری جاں جانم

خون حسرت میں ڈبویا ہے قلم کو میں نے

اب تو کٹ جائیں گے لمحات پریشاں جانم

روز کھلتے ہیں کسی وعدۂ جاناں کے بغیر

پھول موسم سے نہیں کرتے ہیں پیماں جانم

ہم نے گرداب کی پازیب بنا ڈالی ہے

ہاتھ کنگن میں سجی گردش دوراں جانم

خوش گماں لفظ میں خوشبو ہے ترے پیکر کی

کتنا پر کیف ترے خط کا ہے احساں جانم

مصحف نور نظر آئی تری پاک جبیں

تیرا چہرہ بھی تو ہے رشک گلستاں جانم