hairat hi rah gai hai jahan-e-KHarab mein

hairat hī rah ga.ī hai jahān-e-ḳharāb meñ

haa.e sudhar ga.e haiñ vo apne shabāb meñ

dastak bhī jald aa ga.ī kuchh vaqt bhī thā kam

haDDī ke saath baal bhī aayā kabāb meñ

girya shab-e-firāq meñ kar ke banā de nahar

phir māhtāb dekhnā utregā aab meñ

jī bhar ke nekiyāñ karūñ aur vo bhī is liye

har baar phir maiñ aap ko māñgūñ savāb meñ

is bevafā.ī ke liye tayyār thī meñ dost

kal raat daañt TūTtā dekhā thā ḳhvāb meñ

hairat se dekhte rahe us ko banā ke ham

kaisī kashish thī rañg the faanī habāb meñ

piite hī dil meñ ġham utar aayā surūr na.iiñ

kuchh ashk aa gire the hamārī sharāb meñ

hairat hi rah gai hai jahan-e-KHarab mein

hae sudhar gae hain wo apne shabab mein

dastak bhi jald aa gai kuchh waqt bhi tha kam

haDDi ke sath baal bhi aaya kabab mein

girya shab-e-firaq mein kar ke bana de nahar

phir mahtab dekhna utrega aab mein

ji bhar ke nekiyan karun aur wo bhi is liye

har bar phir main aap ko mangun sawab mein

is bewafai ke liye tayyar thi mein dost

kal raat dant TuTta dekha tha KHwab mein

hairat se dekhte rahe us ko bana ke hum

kaisi kashish thi rang the fani habab mein

pite hi dil mein gham utar aaya surur nain

kuchh ashk aa gire the hamari sharab mein