hairat mein bhi baqi hai mujhe hosh-e-mohabbat

hairat meñ bhī baaqī hai mujhe hosh-e-mohabbat

āñkheñ dam-e-dīdār haiñ mai-nosh-e-mohabbat

phir jaatī haiñ mahfil meñ agar aur ko dekhūñ

us shoḳh kī āñkheñ haiñ ḳhatā-posh-e-mohabbat

iqrār kiyā thā ki taġhāful na kareñge

kuchh yaad hai o va.ada-farāmosh-e-mohabbat

āshiq ko ye rāhat kabhī pahle na milī thī

marqad ko bajā kahte haiñ āġhosh-e-mohabbat

hañsne hī se tum gul chaman-e-husn ke Thahre

maiñ chup huuñ to huuñ bulbul-e-ḳhāmosh-e-mohabbat

jo baat na thī kahne kī mansūr ne kah dī

yuuñ ḳhāna-bar-andāz huā josh-e-mohabbat

sunñe ko tire tarse hai paiġhām zabānī

merā dil-e-sad-raḳhna banā gosh-e-mohabbat

ā.īna-e-hairat meñ hai masrūf-e-tamāshā

mahrūm nahīñ bole se mad.hosh-e-mohabbat

nazzāre kā hai lutf vo aa.e sar-e-bālīñ

hai talḳhī-e-murdan samar-e-nosh-e-mohabbat

ye sar se chalā.e to chalūñ tā-dam-e-āḳhir

munqād-e-mohabbat huuñ razā-kosh-e-mohabbat

baḌhtā hī gayā us ke ta'alluq ke barābar

hai rashk-e-adū ham-sar-o-ham-dosh-e-mohabbat

jo chāho 'zakī' ko kaho alqāb bahut haiñ

dīvāna-o-sar-gashta-o-behosh-e-mohabbat

hairat mein bhi baqi hai mujhe hosh-e-mohabbat

aankhen dam-e-didar hain mai-nosh-e-mohabbat

phir jati hain mahfil mein agar aur ko dekhun

us shoKH ki aankhen hain KHata-posh-e-mohabbat

iqrar kiya tha ki taghaful na karenge

kuchh yaad hai o wada-faramosh-e-mohabbat

aashiq ko ye rahat kabhi pahle na mili thi

marqad ko baja kahte hain aaghosh-e-mohabbat

hansne hi se tum gul chaman-e-husn ke Thahre

main chup hun to hun bulbul-e-KHamosh-e-mohabbat

jo baat na thi kahne ki mansur ne kah di

yun KHana-bar-andaz hua josh-e-mohabbat

sunne ko tere tarse hai paigham zabani

mera dil-e-sad-raKHna bana gosh-e-mohabbat

aaina-e-hairat mein hai masruf-e-tamasha

mahrum nahin bole se madhosh-e-mohabbat

nazzare ka hai lutf wo aae sar-e-baalin

hai talKHi-e-murdan samar-e-nosh-e-mohabbat

ye sar se chalae to chalun ta-dam-e-aKHir

munqad-e-mohabbat hun raza-kosh-e-mohabbat

baDhta hi gaya us ke ta'alluq ke barabar

hai rashk-e-adu ham-sar-o-ham-dosh-e-mohabbat

jo chaho 'zaki' ko kaho alqab bahut hain

diwana-o-sar-gashta-o-behosh-e-mohabbat