hairat se apna chehra wo dekha kiya gaya

hairat se apnā chehra vo dekhā kiyā gayā

bikhrā huā jo dil mirā yakjā kiyā gayā

ik aks ko davām dilāyā gayā hai aaj

koī to kaam aañkh se achchhā kiyā gayā

har shaḳhs dekhtā jise apnī nazar se hai

kyoñ dard saare shahr pe ifshā kiyā gayā

yak-laḳht vāhime kī chubhan aur baḌh ga.ī

jab justujū ko tan kā labāda kiyā gayā

ye dil taġhayyurāt kā maarā Dasā ye dil

gulshan kiyā gayā kabhī sahrā kiyā gayā

dil ko hamāre vo hī 'duā' toḌtā gayā

jis shaḳhs par bhī dil se bharosā kiyā gayā

hairat se apna chehra wo dekha kiya gaya

bikhra hua jo dil mera yakja kiya gaya

ek aks ko dawam dilaya gaya hai aaj

koi to kaam aankh se achchha kiya gaya

har shaKHs dekhta jise apni nazar se hai

kyon dard sare shahr pe ifsha kiya gaya

yak-laKHt wahime ki chubhan aur baDh gai

jab justuju ko tan ka labaada kiya gaya

ye dil taghayyuraat ka mara Dasa ye dil

gulshan kiya gaya kabhi sahra kiya gaya

dil ko hamare wo hi 'dua' toDta gaya

jis shaKHs par bhi dil se bharosa kiya gaya