haiwan ki manzil mein bashar hai ki nahin hai

haivān kī manzil meñ bashar hai ki nahīñ hai

insān ko insān kā Dar hai ki nahīñ hai

me.ār-e-tajallī se to vāqif haiñ nigāheñ

jalvoñ ko bhī andāz-e-nazar hai ki nahīñ hai

farzāna-e-daurāñ bhī hai is baat pe ḳhāmosh

dīvāna sar-e-rāhguzar hai ki nahīñ hai

jis azm se manzil pe pahuñchte haiñ musāfir

vo azm ba-īñ zauq-e-safar hai ki nahīñ hai

be-sāḳhta manzil kī taraf bhāgne vaalo

raftār-e-zamāna kī ḳhabar hai ki nahīñ hai

rañgīnī-e-āġhāz-e-bahārāñ ke asīro

anjām-e-bahārāñ pe nazar hai ki nahīñ hai

nā-qadrī-e-afkār ke is daur-e-falak meñ

maa.il ba-qalam dast-e-hunar hai ki nahīñ hai

arbāb-e-mohabbat pe jo Dhaa.ī hai qayāmat

us shām-e-shab-e-ġham kī sahar hai ki nahīñ hai

jis dar se nasīm-e-saharī ghar meñ ho dāḳhil

kāshāna-e-imkāñ meñ vo dar hai ki nahīñ hai

bātil kā galā kaaT de jo haq kī madad se

ḳhūn-e-rag-e-jāñ meñ vo asar hai ki nahīñ hai

jis daaġh kī tārīf hai dāġh-e-ġham-e-jānāñ

vo daaġh ba-me.ār-e-jigar hai ki nahīñ hai

vo zaḳhm-e-tamannā jo muqaddar hai 'sabā' kā

us zaḳhm pe hikmat kī nazar hai ki nahīñ hai

haiwan ki manzil mein bashar hai ki nahin hai

insan ko insan ka Dar hai ki nahin hai

mear-e-tajalli se to waqif hain nigahen

jalwon ko bhi andaz-e-nazar hai ki nahin hai

farzana-e-dauran bhi hai is baat pe KHamosh

diwana sar-e-rahguzar hai ki nahin hai

jis azm se manzil pe pahunchte hain musafir

wo azm ba-in zauq-e-safar hai ki nahin hai

be-saKHta manzil ki taraf bhagne walo

raftar-e-zamana ki KHabar hai ki nahin hai

rangini-e-aghaz-e-bahaaran ke asiro

anjam-e-bahaaran pe nazar hai ki nahin hai

na-qadri-e-afkar ke is daur-e-falak mein

mail ba-qalam dast-e-hunar hai ki nahin hai

arbab-e-mohabbat pe jo Dhai hai qayamat

us sham-e-shab-e-gham ki sahar hai ki nahin hai

jis dar se nasim-e-sahari ghar mein ho daKHil

kashana-e-imkan mein wo dar hai ki nahin hai

baatil ka gala kaT de jo haq ki madad se

KHun-e-rag-e-jaan mein wo asar hai ki nahin hai

jis dagh ki tarif hai dagh-e-gham-e-jaanan

wo dagh ba-mear-e-jigar hai ki nahin hai

wo zaKHm-e-tamanna jo muqaddar hai 'saba' ka

us zaKHm pe hikmat ki nazar hai ki nahin hai