ہلاکت دل ناشاد رائیگاں بھی نہیں

ہلاکت دل ناشاد رائیگاں بھی نہیں

نگاہ دوست میں اب کوئی امتحاں بھی نہیں

تلاش دیر و حرم کا مآل کیا کہیے

سکوں یہاں بھی نہیں ہے سکوں وہاں بھی نہیں

تری نگاہ نے کھولا معاملہ دل کا

نظر زباں نہیں رکھتی پہ بے زباں بھی نہیں

اسی کو سارے زمانے سے ہم چھپائے رہے

وہ ایک بات زمانے سے جو نہاں بھی نہیں

ثبوت برق کی غارت گری کا کس سے ملے

کہ آشیاں تھا جہاں اب وہاں دھواں بھی نہیں

نشان قافلۂ عمر ڈھونڈنے والو

یہاں تو دور تلک گرد کارواں بھی نہیں