halakat-e-dil-e-nashad raegan bhi nahin

halākat-e-dil-e-nāshād rā.egāñ bhī nahīñ

nigāh-e-dost meñ ab koī imtihāñ bhī nahīñ

talāsh-e-dair-o-haram kā ma.aal kyā kahiye

sukūñ yahāñ bhī nahīñ hai sukūñ vahāñ bhī nahīñ

tirī nigāh ne kholā mo.āmla dil kā

nazar zabāñ nahīñ rakhtī pa be-zabāñ bhī nahīñ

usī ko saare zamāne se ham chhupā.e rahe

vo ek baat zamāne se jo nihāñ bhī nahīñ

subūt barq kī ġhārat-garī kā kis se mile

ki āshiyāñ thā jahāñ ab vahāñ dhuāñ bhī nahīñ

nishān-e-qāfila-e-umr DhūñDne vaalo

yahāñ to duur talak gard-e-kārvāñ bhī nahīñ

halakat-e-dil-e-nashad raegan bhi nahin

nigah-e-dost mein ab koi imtihan bhi nahin

talash-e-dair-o-haram ka maal kya kahiye

sukun yahan bhi nahin hai sukun wahan bhi nahin

teri nigah ne khola moamla dil ka

nazar zaban nahin rakhti pa be-zaban bhi nahin

usi ko sare zamane se hum chhupae rahe

wo ek baat zamane se jo nihan bhi nahin

subut barq ki ghaarat-gari ka kis se mile

ki aashiyan tha jahan ab wahan dhuan bhi nahin

nishan-e-qafila-e-umr DhunDne walo

yahan to dur talak gard-e-karwan bhi nahin