halqe nahin hain zulf ke halqe hain jal ke

halqe nahīñ haiñ zulf ke halqe haiñ jaal ke

haañ ai nigāh-e-shauq zarā dekh-bhāl ke

pahuñche haiñ tā-kamar jo tire gesū-e-rasā

ma.anī ye haiñ kamar bhī barābar hai baal ke

bos-o-kanār-o-vasl-e-hasīnāñ hai ḳhuub shaġhl

kamtar buzurg hoñge ḳhilāf is ḳhayāl ke

qāmat se tere sāne-e-qudrat ne ai hasīñ

dikhlā diyā hai hashr ko sāñche meñ Dhaal ke

shān-e-dimāġh ishq ke jalve se ye baḌhī

rakhtā hai hosh bhī qadam apne sambhāl ke

zīnat muqaddama hai musībat kā dahr meñ

sab sham.a ko jalāte haiñ sāñche meñ Dhaal ke

hastī ke haq ke sāmne kyā asl-e-īn-o-āñ

putle ye sab haiñ aap ke vahm-o-ḳhayāl ke

talvār le ke uThtā hai har tālib-e-faroġh

daur-e-falak meñ haiñ ye ishāre hilāl ke

pechīda zindagī ke karo tum muqaddame

dikhlā hī degī maut natīja nikāl ke

halqe nahin hain zulf ke halqe hain jal ke

han ai nigah-e-shauq zara dekh-bhaal ke

pahunche hain ta-kamar jo tere gesu-e-rasa

mani ye hain kamar bhi barabar hai baal ke

bos-o-kanar-o-wasl-e-hasinan hai KHub shaghl

kamtar buzurg honge KHilaf is KHayal ke

qamat se tere sane-e-qudrat ne ai hasin

dikhla diya hai hashr ko sanche mein Dhaal ke

shan-e-dimagh ishq ke jalwe se ye baDhi

rakhta hai hosh bhi qadam apne sambhaal ke

zinat muqaddama hai musibat ka dahr mein

sab shama ko jalate hain sanche mein Dhaal ke

hasti ke haq ke samne kya asl-e-in-o-an

putle ye sab hain aap ke wahm-o-KHayal ke

talwar le ke uThta hai har talib-e-farogh

daur-e-falak mein hain ye ishaare hilal ke

pechida zindagi ke karo tum muqaddame

dikhla hi degi maut natija nikal ke