hum aankhon se bhi arz-e-tamanna nahin karte

ham āñkhoñ se bhī arz-e-tamannā nahīñ karte

mub.ham sā ishāra bhī gavārā nahīñ karte

hāsil hai jinheñ daulat-e-sad-ābla-pā.ī

vo shikva-e-be-rañgi-e-sahrā nahīñ karte

sad-shukr ki dil meñ abhī ik qatra-e-ḳhūñ hai

ham shikva-e-be-rañgi-e-duniyā nahīñ karte

maqsūd ibādat hai faqat diid nahīñ hai

ham pūjte haiñ aap ko dekhā nahīñ karte

kaafī hai tirā naqsh-e-qadam chāhe jahāñ ho

ham pairvi-e-dair-o-kalīsā nahīñ karte

sajda bhī hai minjumla-e-asbāb-e-numā.ish

jo ḳhud se guzar jaate haiñ sajda nahīñ karte

jin ko hai tirī zaat se yak-gūna ta.alluq

vo tere taġhāful kī bhī parvā nahīñ karte

ye lamha-e-hāzir to hai kaunain kā hāsil

ham haal ko nazr-e-ġham-e-fardā nahīñ karte

har aag ko pahlū meñ chhupā lete haiñ 'saġhar'

ham tundi-e-sahbā se bhī pighlā nahīñ karte

hum aankhon se bhi arz-e-tamanna nahin karte

mubham sa ishaara bhi gawara nahin karte

hasil hai jinhen daulat-e-sad-abla-pai

wo shikwa-e-be-rangi-e-sahra nahin karte

sad-shukr ki dil mein abhi ek qatra-e-KHun hai

hum shikwa-e-be-rangi-e-duniya nahin karte

maqsud ibaadat hai faqat did nahin hai

hum pujte hain aap ko dekha nahin karte

kafi hai tera naqsh-e-qadam chahe jahan ho

hum pairwi-e-dair-o-kalisa nahin karte

sajda bhi hai minjumla-e-asbab-e-numaish

jo KHud se guzar jate hain sajda nahin karte

jin ko hai teri zat se yak-guna talluq

wo tere taghaful ki bhi parwa nahin karte

ye lamha-e-hazir to hai kaunain ka hasil

hum haal ko nazr-e-gham-e-farda nahin karte

har aag ko pahlu mein chhupa lete hain 'saghar'

hum tundi-e-sahba se bhi pighla nahin karte