hum achchhe mazamin ko ghaarat nahin karte

ham achchhe mazāmīn ko ġhārat nahīñ karte

bachchoñ kī tarah aisī sharārat nahīñ karte

ġhazloñ kī to har tarah se karte haiñ hifāzat

bhūle se bhī nazmoñ kī tijārat nahīñ karte

Dhah jaa.e jo ik ret kī dīvār kī sūrat

ta.amīr havāoñ meñ imārat nahīñ karte

sah lete haiñ dānista bhī hālāt ke dhakke

lekin shah-e-jābir kī safārat nahīñ karte

guzrī jo sadī terī thī ab merī hai merī

ġhālib se ye kahne kī jasārat nahīñ karte

urdu ke kuchh aise bhī suḳhnavar haiñ jo 'nāshād'

urdu meñ kalām apnā ibārat nahīñ karte

hum achchhe mazamin ko ghaarat nahin karte

bachchon ki tarah aisi shararat nahin karte

ghazlon ki to har tarah se karte hain hifazat

bhule se bhi nazmon ki tijarat nahin karte

Dhah jae jo ek ret ki diwar ki surat

tamir hawaon mein imarat nahin karte

sah lete hain danista bhi haalat ke dhakke

lekin shah-e-jabir ki safarat nahin karte

guzri jo sadi teri thi ab meri hai meri

ghaalib se ye kahne ki jasarat nahin karte

urdu ke kuchh aise bhi suKHnawar hain jo 'nashad'

urdu mein kalam apna ibarat nahin karte