hum ahl-e-dil ka samajhiye qarar baqi hai

ham ahl-e-dil kā samajhiye qarār baaqī hai

kahīñ koī jo mohabbat-shi'ār baaqī hai

khulī hī rah ga.iiñ bīmār-e-hijr kī āñkheñ

hayāt biit ga.ī intizār baaqī hai

tabāhiyoñ ke sile meñ sukūn-e-dil ke liye

tasavvur-e-nigah-e-sharmsār baaqī hai

lahū ke phuul khile haiñ ravish-ravish dekho

mire chaman meñ abhī tak bahār baaqī hai

agar idhar se koī kārvāñ nahīñ guzrā

to phir ye raah meñ kaisā ġhubār baaqī hai

salīb-o-dār usī kī to surḳhiyāñ haiñ 'ra.īs'

vo dāstāñ jo sar-e-kū-e-yār baaqī hai

hum ahl-e-dil ka samajhiye qarar baqi hai

kahin koi jo mohabbat-shi'ar baqi hai

khuli hi rah gain bimar-e-hijr ki aankhen

hayat bit gai intizar baqi hai

tabahiyon ke sile mein sukun-e-dil ke liye

tasawwur-e-nigah-e-sharmsar baqi hai

lahu ke phul khile hain rawish-rawish dekho

mere chaman mein abhi tak bahaar baqi hai

agar idhar se koi karwan nahin guzra

to phir ye rah mein kaisa ghubar baqi hai

salib-o-dar usi ki to surKHiyan hain 'rais'

wo dastan jo sar-e-ku-e-yar baqi hai