hum ahl-e-gham bhi rakhte hain jadu-bayaniyan

ham ahl-e-ġham bhī rakhte haiñ jādū-bayāniyāñ

ye aur baat hai ki sunīñ lan-tarāniyāñ

sharminda kar na mujh ko mirā haal pūchh kar

le de ke rah ga.ī haiñ yahī be-zabāniyāñ

kam kyā thā ham faqīroñ ko āshob-e-rozgār

kyuuñ yaad aa rahī haiñ tirī mehrbāniyāñ

dāman ke chaak chaak meñ hai mausam-e-bahār

aao ki ḳhūn-e-dil se kareñ guf-fishāniyāñ

ahl-e-zamāna tum bhī baḌe vaqt par mile

kuchh baar ho chalī thiiñ mirī shādmāniyāñ

tum ne bhulā diyā to na.ī baat kyā huī

rahtī haiñ yaad kis ko vafā kī kahāniyāñ

jī khol kar luTā.eñge ab terī raah meñ

tere balā-kashoñ ko milī haiñ javāniyāñ

rakh lo ki zindagī meñ kabhī kaam ā.eñgī

dīvāngān-e-ishq kī bhī kuchh nishāniyāñ

hum ahl-e-gham bhi rakhte hain jadu-bayaniyan

ye aur baat hai ki sunin lan-taraniyan

sharminda kar na mujh ko mera haal puchh kar

le de ke rah gai hain yahi be-zabaniyan

kam kya tha hum faqiron ko aashob-e-rozgar

kyun yaad aa rahi hain teri mehrbaniyan

daman ke chaak chaak mein hai mausam-e-bahaar

aao ki KHun-e-dil se karen guf-fishaniyan

ahl-e-zamana tum bhi baDe waqt par mile

kuchh bar ho chali thin meri shadmaniyan

tum ne bhula diya to nai baat kya hui

rahti hain yaad kis ko wafa ki kahaniyan

ji khol kar luTaenge ab teri rah mein

tere bala-kashon ko mili hain jawaniyan

rakh lo ki zindagi mein kabhi kaam aaengi

diwangan-e-ishq ki bhi kuchh nishaniyan