hum ahl-e-jabr ke nam-o-nasab se waqif hain

ham ahl-e-jabr ke nām-o-nasab se vāqif haiñ

saroñ kī fasl jab utrī thī tab se vāqif haiñ

kabhī chhupe hue ḳhanjar kabhī khiñchī huī teġh

sipāh-e-zulm ke ek ek Dhab se vāqif haiñ

vo jin kī dast-ḳhateñ mahzar-e-sitam pe haiñ sabt

har us adiib har us be-adab se vāqif haiñ

ye raat yuuñ hī to dushman nahīñ hamārī ki ham

darāzi-e-shab-e-ġham ke sabab se vāqif haiñ

nazar meñ rakhte haiñ asr-e-buland-e-bāmi-e-mehr

furāt-e-jabr ke har tishna-lab se vāqif haiñ

koī na.ī to nahīñ harf-e-haq kī tanhā.ī

jo jānte haiñ vo is amr-e-rab se vāqif haiñ

hum ahl-e-jabr ke nam-o-nasab se waqif hain

saron ki fasl jab utri thi tab se waqif hain

kabhi chhupe hue KHanjar kabhi khinchi hui tegh

sipah-e-zulm ke ek ek Dhab se waqif hain

wo jin ki dast-KHaten mahzar-e-sitam pe hain sabt

har us adib har us be-adab se waqif hain

ye raat yun hi to dushman nahin hamari ki hum

daraazi-e-shab-e-gham ke sabab se waqif hain

nazar mein rakhte hain asr-e-buland-e-baami-e-mehr

furaat-e-jabr ke har tishna-lab se waqif hain

koi nai to nahin harf-e-haq ki tanhai

jo jaante hain wo is amr-e-rab se waqif hain