hum ai gham-e-hayat na jaane kahan rahe

ham ai ġham-e-hayāt na jaane kahāñ rahe

jab husn-e-ittifāq se vo mehrbāñ rahe

jis vaqt chhiḌ ga.ī hai nigār-e-sahar kī baat

taare shab-e-firāq mire ham-zabāñ rahe

kyā ehtimām-e-husn-e-chaman kar sake bayāñ

jab ḳhud dil-e-bahār meñ paiham ḳhizāñ rahe

phir zindagī kare na koī aur aarzū

gar us ke saath ek ġham-e-jāvedāñ rahe

yā manziloñ ke zikr se tum ne diyā fareb

yā ham hī mahv-e-gard-e-rah-e-kārvāñ rahe

nākāmiyoñ kā ab ye taqāzā hai baar baar

har vaqt ek kashmakash-e-imtihāñ rahe

tārīk rāste meñ bhī 'azmat' hamāre saath

zaḳhm-e-vafā meñ rañg-e-mah-o-kahkashāñ rahe

hum ai gham-e-hayat na jaane kahan rahe

jab husn-e-ittifaq se wo mehrban rahe

jis waqt chhiD gai hai nigar-e-sahar ki baat

tare shab-e-firaq mere ham-zaban rahe

kya ehtimam-e-husn-e-chaman kar sake bayan

jab KHud dil-e-bahaar mein paiham KHizan rahe

phir zindagi kare na koi aur aarzu

gar us ke sath ek gham-e-jawedan rahe

ya manzilon ke zikr se tum ne diya fareb

ya hum hi mahw-e-gard-e-rah-e-karwan rahe

nakaamiyon ka ab ye taqaza hai bar bar

har waqt ek kashmakash-e-imtihan rahe

tarik raste mein bhi 'azmat' hamare sath

zaKHm-e-wafa mein rang-e-mah-o-kahkashan rahe