hum aise log shishe mein utar jate hain dil-dara

ham aise log shīshe meñ utar jaate haiñ dil-dārā

chhanak kar TuuT jaate haiñ bikhar jaate haiñ dil-dārā

harā rahtā hai duniyā meñ har ik paudā mohabbat kā

jahāñ tak shāḳh jaatī hai samar jaate haiñ dil-dārā

hamāre dil kī chingārī ko bas ik phūñk kaafī hai

ziyāda saañs le koī to Dar jaate haiñ dil-dārā

bahut din kah liyā ham tum pe marte tum pe marte haiñ

bas ab kī baar yuuñ karte haiñ mar jaate haiñ dil-dārā

ham apne chaukhaTe meñ hī khaḌe rahte haiñ be-jumbish

hamāre paañv se raste guzar jaate haiñ dil-dārā

jaḌeñ mazbūt rakhne se ġharaz hai apne paudoñ ko

ye sar kaTvā.eñ to ulTā sañvar jaate haiñ dil-dārā

vahāñ tak justujū be-minnat-e-ummīd jaatī hai

jahāñ tak saath saḌkoñ ke shajar jaate haiñ dildār

bas ab kuchh aur to lenā nahīñ bāzār-e-duniyā se

dukāneñ band hone ko haiñ ghar jaate haiñ dil-dārā

hum aise log shishe mein utar jate hain dil-dara

chhanak kar TuT jate hain bikhar jate hain dil-dara

hara rahta hai duniya mein har ek pauda mohabbat ka

jahan tak shaKH jati hai samar jate hain dil-dara

hamare dil ki chingari ko bas ek phunk kafi hai

ziyaada sans le koi to Dar jate hain dil-dara

bahut din kah liya hum tum pe marte tum pe marte hain

bas ab ki bar yun karte hain mar jate hain dil-dara

hum apne chaukhaTe mein hi khaDe rahte hain be-jumbish

hamare panw se raste guzar jate hain dil-dara

jaDen mazbut rakhne se gharaz hai apne paudon ko

ye sar kaTwaen to ulTa sanwar jate hain dil-dara

wahan tak justuju be-minnat-e-ummid jati hai

jahan tak sath saDkon ke shajar jate hain dildar

bas ab kuchh aur to lena nahin bazar-e-duniya se

dukanen band hone ko hain ghar jate hain dil-dara