hum apna ism le kar shahr-e-sifat se nikle

ham apnā ism le kar shahr-e-sifat se nikle

phir ma.arifa-o-nakra saare luġhat se nikle

lafzoñ meñ us ne apne ā.īne rakh diye the

parda-nashīñ ke saare aks us ke ḳhat se nikle

kyā rāstī hamārī apnī kajī se niklī

ham kyā durust ho kar apne ġhalat se nikle

kaj-fahmiyoñ ne jitnī hajveñ likhīñ hamārī

ham utne hī ziyāda apnī likhat se nikle

bāhar galī meñ bhārī fauj-e-ḳhudā paḌī thī

ham kāfir-e-mohabbat nā-chār chhat se nikle

ham jo bachā bachā ke rakhte rahe the ḳhud ko

kañgāl ho ke āḳhir apnī bachat se nikle

kaaTā gayā thā ham ko ik ḳhaas zāviye se

ye sher sab qalam ke us ḳhaas qat se nikle

bechā hai kauḌiyoñ ke mol apnā maal saarā

aur is tarah ḳhud apnī baḌhtī khapat se nikle

suufī the ham magar the rūhāniyat ke qaidī

āḳhir ko apnī miTTī kī ma.arifat se nikle

juġhrāfiya thiiñ yā phir tārīḳh saarī jihatañ

ham ho ke 'farhat-ehsās' apnī jihat se nikle

hum apna ism le kar shahr-e-sifat se nikle

phir marifa-o-nakra sare lughat se nikle

lafzon mein us ne apne aaine rakh diye the

parda-nashin ke sare aks us ke KHat se nikle

kya rasti hamari apni kaji se nikli

hum kya durust ho kar apne ghalat se nikle

kaj-fahmiyon ne jitni hajwen likhin hamari

hum utne hi ziyaada apni likhat se nikle

bahar gali mein bhaari fauj-e-KHuda paDi thi

hum kafir-e-mohabbat na-chaar chhat se nikle

hum jo bacha bacha ke rakhte rahe the KHud ko

kangal ho ke aaKHir apni bachat se nikle

kaTa gaya tha hum ko ek KHas zawiye se

ye sher sab qalam ke us KHas qat se nikle

becha hai kauDiyon ke mol apna mal sara

aur is tarah KHud apni baDhti khapat se nikle

sufi the hum magar the ruhaniyat ke qaidi

aaKHir ko apni miTTi ki marifat se nikle

jughrafiya thin ya phir tariKH sari jihatan

hum ho ke 'farhat-ehsas' apni jihat se nikle