ہم اپنے آپ سے آگے گزر جاتے تو اچھا تھا

ہم اپنے آپ سے آگے گزر جاتے تو اچھا تھا

کسی سے پیار کرتے اور مر جاتے تو اچھا تھا

ہوا خوشبو سمیٹے شہر کی جانب چلی آتی

کبھی دشت و جبل یہ کام کر جاتے تو اچھا تھا

انہیں بھی کچھ خبر ہوتی مرے حال پریشاں کی

حیا کے بوجھ سے وہ بھی بکھر جاتے تو اچھا تھا

یہ رنگیں محفلیں یہ رقص پیہم چاند تاروں کا

یہاں سے لوٹ کر ہم اپنے گھر جاتے تو اچھا تھا

نہ یوں آوارگان عشق میں ہم نام لکھواتے

مری جاں دل مرا لے کر مکر جاتے تو اچھا تھا

سبھی الزام تم نے اپنے سر لے کر عنایت کی

مگر الزام کچھ میرے بھی سر جاتے تو اچھا تھا

یہ بے احساس سے باد صبا کے بے صدا جھونکے

مرے پھولوں پہ کچھ شبنمؔ بھی دھر جاتے تو اچھا تھا