ہم اپنے عہد سے کچھ اس لیے بھی پیچھے تھے

ہم اپنے عہد سے کچھ اس لیے بھی پیچھے تھے

ہمارے سر پہ پرانی انا کے ملبے تھے

ہم ایسے وقت میں آواز بھی کسے دیتے

نظر کے سامنے کچھ ڈوبتے جزیرے تھے

وہ بجھ گیا تو چلا اس کی اہمیت کا پتہ

کہ اس کی آگ سے کتنے چراغ جلتے تھے

مجھے اتار کے خود کو بچا لیا اس نے

میں وہ لباس ہوں جس پر لہو کے دھبے تھے

ترے قریب سے گزرے تو یوں لگا ہم کو

بہت دنوں سے تری بازگشت سنتے تھے

ہمارے حال پہ روئی تھی بند کھڑکی بھی

ہوا کے ہاتھ کسی نے پیام بھیجے تھے