hum apne dukh ko gane lag gae hain

ham apne dukh ko gaane lag ga.e haiñ

magar is meñ zamāne lag ga.e haiñ

kisī kī tarbiyat kā hai karishma

ye aañsū muskurāne lag ga.e haiñ

kahānī ruḳh badalnā chāhtī hai

na.e kirdār aane lag ga.e haiñ

ye hāsil hai mirī ḳhāmoshiyoñ kā

ki patthar āzmāne lag ga.e haiñ

ye mumkin hai kisī din tum bhī aao

parinde aane jaane lag ga.e haiñ

jinheñ ham manziloñ tak le ke aa.e

vahī rasta batāne lag ga.e haiñ

sharāfat rañg dikhlātī hai 'dānish'

ka.ī dushman Thikāne lag ga.e haiñ

hum apne dukh ko gane lag gae hain

magar is mein zamane lag gae hain

kisi ki tarbiyat ka hai karishma

ye aansu muskurane lag gae hain

kahani ruKH badalna chahti hai

nae kirdar aane lag gae hain

ye hasil hai meri KHamoshiyon ka

ki patthar aazmane lag gae hain

ye mumkin hai kisi din tum bhi aao

parinde aane jaane lag gae hain

jinhen hum manzilon tak le ke aae

wahi rasta batane lag gae hain

sharafat rang dikhlati hai 'danish'

kai dushman Thikane lag gae hain