hum apne nam se hargiz kahin jaane nahin jate

ham apne naam se hargiz kahīñ jaane nahīñ jaate

tumhārā naam na lete to pahchāne nahīñ jaate

kabhī jo bhūle bhaTke se bhī maiḳhāne nahīñ jaate

ye na samjho ki un ke paas paimāne nahīñ jaate

kisī ke dil meñ kyā hai māthe pe likkhā nahīñ hotā

ki apne log bhī to ham se pahchāne nahīñ jaate

añdhere rahbarī karte haiñ parvānoñ kī sham.a tak

ki din meñ sham.a ke nazdīk parvāne nahīñ jaate

mire pā-e-talab mujh ko tumhāre dar pe le aa.e

kisī aur dar pe ab ham haath phailāne nahīñ jaate

unheñ chugne ko uḌ kar duur tak jaanā hī paḌtā hai

kisī bhī ghoñsle meñ ḳhud-ba-ḳhud daane nahīñ jaate

hamārī manzil-e-maqsūd to hai qabr se aage

vahāñ tak bhī hameñ ye log pahuñchāne nahīñ jaate

mire pur-soz naġhme tarjumānī haiñ mohabbat kī

ham un kī bazm meñ yuuñ hī ġhazal gaane nahīñ jaate

kabhī jab zaḳhm lagte haiñ to kāñTe chuTkī bharte haiñ

guloñ ke gul-numā ḳhanjar to pahchāne nahīñ jaate

hasīnoñ kī numā.ish meñ mohabbat to nahīñ dikhtī

ye pahchāne to jaate haiñ magar jaane nahīñ jaate

mohabbat ke pujārī apnī puujā aise karte haiñ

sanam-ḳhāne chale jaate haiñ but-ḳhāne nahīñ jaate

ka.ī rāz-e-mohabbat dil meñ poshīda hī rahte haiñ

ye gauhar jauharī se bhī to pahchāne nahīñ jaate

nichhāvar jaan karne ko ye 'sāhil' us pe jaate haiñ

ki jalne ke liye sham.a pe parvāne nahīñ jaate

hum apne nam se hargiz kahin jaane nahin jate

tumhaara nam na lete to pahchane nahin jate

kabhi jo bhule bhaTke se bhi maiKHane nahin jate

ye na samjho ki un ke pas paimane nahin jate

kisi ke dil mein kya hai mathe pe likkha nahin hota

ki apne log bhi to hum se pahchane nahin jate

andhere rahbari karte hain parwanon ki shama tak

ki din mein shama ke nazdik parwane nahin jate

mere pa-e-talab mujh ko tumhaare dar pe le aae

kisi aur dar pe ab hum hath phailane nahin jate

unhen chugne ko uD kar dur tak jaana hi paDta hai

kisi bhi ghonsle mein KHud-ba-KHud dane nahin jate

hamari manzil-e-maqsud to hai qabr se aage

wahan tak bhi hamein ye log pahunchane nahin jate

mere pur-soz naghme tarjumani hain mohabbat ki

hum un ki bazm mein yun hi ghazal gane nahin jate

kabhi jab zaKHm lagte hain to kanTe chuTki bharte hain

gulon ke gul-numa KHanjar to pahchane nahin jate

hasinon ki numaish mein mohabbat to nahin dikhti

ye pahchane to jate hain magar jaane nahin jate

mohabbat ke pujari apni puja aise karte hain

sanam-KHane chale jate hain but-KHane nahin jate

kai raaz-e-mohabbat dil mein poshida hi rahte hain

ye gauhar jauhari se bhi to pahchane nahin jate

nichhawar jaan karne ko ye 'sahil' us pe jate hain

ki jalne ke liye shama pe parwane nahin jate