ہم اپنے پاس بھی رکھتے تھے آن بان کبھی

ہم اپنے پاس بھی رکھتے تھے آن بان کبھی

وہ حکم ہوتا تھا کھلتی تھی جب زبان کبھی

جنہیں سمیٹ دیا وقت کے تقاضوں سے

انہیں پروں میں فلک بوس تھی اڑان کبھی

وہ کیسے لوگ تھے پلکیں بچھائے رہتے تھے

پڑوس میں بھی جو آ جائے میہمان کبھی

جو قتل و خون کا بازار بند ہو جائے

مری زمین بھی ہو جائے آسمان کبھی

جو اپنے سر پہ سدا سائبان رکھتے ہیں

انہیں بھی دھوپ میں دینا ہے امتحان کبھی

رہے خیال یہ جاویدؔ دار فانی میں

جو ہے وجود تو ہونا ہے بے نشان کبھی