hum apni manzilon ka aap hi naqsha banate hain

ham apnī manziloñ kā aap hī naqsha banāte haiñ

chaTāneñ kaaT kar apne liye rasta banāte haiñ

riyā-kārī hamāre sāmne kyā sar uThā.egī

jo sach ko sach batā.e ham vo ā.īna banāte haiñ

alag naqsha banātā hai udhar ik āsmāñ vaalā

zamīñ vaale zamīñ par jab koī naqsha banāte haiñ

na ho dīvār kī bandish na sarhad kī lakīreñ hoñ

ham apnī kāvishoñ se aisī hī duniyā banāte haiñ

rukāvaT ko rukāvaT kab samajhte haiñ ham ahl-e-dil

hamāre vāste hālāt ḳhud rasta banāte haiñ

usī ik baat par nālāñ haiñ ham se log bastī ke

jinheñ kahte haiñ ham apnā unheñ apnā banāte haiñ

ham aise peḌ haiñ 'najmī' jhulaste reg-zāroñ meñ

jo taptī dhuup sah kar bhī ghanā saaya banāte haiñ

hum apni manzilon ka aap hi naqsha banate hain

chaTanen kaT kar apne liye rasta banate hain

riya-kari hamare samne kya sar uThaegi

jo sach ko sach batae hum wo aaina banate hain

alag naqsha banata hai udhar ek aasman wala

zamin wale zamin par jab koi naqsha banate hain

na ho diwar ki bandish na sarhad ki lakiren hon

hum apni kawishon se aisi hi duniya banate hain

rukawaT ko rukawaT kab samajhte hain hum ahl-e-dil

hamare waste haalat KHud rasta banate hain

usi ek baat par nalan hain hum se log basti ke

jinhen kahte hain hum apna unhen apna banate hain

hum aise peD hain 'najmi' jhulaste reg-zaron mein

jo tapti dhup sah kar bhi ghana saya banate hain