hum apni mohabbat ka tamasha nahin karte

ham apnī mohabbat kā tamāshā nahīñ karte

karte haiñ agar kuchh to dikhāvā nahīñ karte

ye sach hai ki duniyā kī ravish Thiik nahīñ hai

kuchh ham bhī to duniyā ko gavārā nahīñ karte

ik baar to mehmān baneñ ghar pe hamāre

ye un se guzārish hai taqāzā nahīñ karte

duniyā ke jhamele hī kuchh aise haiñ ki un ko

ham bhuul to jaate haiñ bhulāyā nahīñ karte

fardā pe haiñ nazreñ to kabhī haal pe nazreñ

maazī ko magar muḌ ke bhī dekhā nahīñ karte

jin meñ ki buzurgoñ kī koī qadr nahīñ ho

ham aise gharoñ meñ kabhī rishta nahīñ karte

bārish ho ki tūfān ho yā aag kā jañgal

ham ghar se nikal jaa.eñ to sochā nahīñ karte

jo ḳhvāb nazar aatā hai sarsabz zamīñ kā

us ḳhvāb kī ta.abīr batāyā nahīñ karte

bāzār meñ bikte nahīñ vo log umūman

rishtoñ kā jo apne kabhī saudā nahīñ karte

hum apni mohabbat ka tamasha nahin karte

karte hain agar kuchh to dikhawa nahin karte

ye sach hai ki duniya ki rawish Thik nahin hai

kuchh hum bhi to duniya ko gawara nahin karte

ek bar to mehman banen ghar pe hamare

ye un se guzarish hai taqaza nahin karte

duniya ke jhamele hi kuchh aise hain ki un ko

hum bhul to jate hain bhulaya nahin karte

farda pe hain nazren to kabhi haal pe nazren

mazi ko magar muD ke bhi dekha nahin karte

jin mein ki buzurgon ki koi qadr nahin ho

hum aise gharon mein kabhi rishta nahin karte

barish ho ki tufan ho ya aag ka jangal

hum ghar se nikal jaen to socha nahin karte

jo KHwab nazar aata hai sarsabz zamin ka

us KHwab ki tabir bataya nahin karte

bazar mein bikte nahin wo log umuman

rishton ka jo apne kabhi sauda nahin karte