hum apni sari KHwahish har tamanna chhoD dete hain

ham apnī saarī ḳhvāhish har tamannā chhoḌ dete haiñ

tumheñ paane ko ham har roz kyā kyā chhoḌ dete haiñ

maiñ jab bhī syaah rātoñ meñ tumhārā naam letā huuñ

tumhārī yaad ke jugnū ujālā chhoḌ dete haiñ

ye tanhā.ī hameñ ik roz tanhā kar ke mānegī

chalo tanhā.iyoñ ko ham hī tanhā chhoḌ dete haiñ

hameñ apnī zamīñ kā hī gharauñdā Thiik lagtā hai

tabhī to ham sitāroñ kā Thikāna chhoḌ dete haiñ

kahīñ rishtoñ ke kamre meñ vo ḳhud ko qaid na samjheñ

so ham bāhar nikalne kā bhī rasta chhoḌ dete haiñ

mohabbat meñ kiyā har ek va.ada yuuñ nibhāte haiñ

ki ham vaade kī ḳhātir saarī duniyā chhoḌ dete haiñ

ziyāda raushnī meñ bhī dikhā.ī kuchh nahīñ detā

tumhārī aañkh khul jaa.e añdherā chhoḌ dete haiñ

ye daulat ġhair kī hai saath to jā hī na pā.egī

to phir kis kaam kā hai ye ḳhazāna chhoḌ dete haiñ

zarūrī to nahīñ hai 'shād' har qissa mukammal ho

to apnī is ġhazal ko bhī adhūrā chhoḌ dete hai

hum apni sari KHwahish har tamanna chhoD dete hain

tumhein pane ko hum har roz kya kya chhoD dete hain

main jab bhi syah raaton mein tumhaara nam leta hun

tumhaari yaad ke jugnu ujala chhoD dete hain

ye tanhai hamein ek roz tanha kar ke manegi

chalo tanhaiyon ko hum hi tanha chhoD dete hain

hamein apni zamin ka hi gharaunda Thik lagta hai

tabhi to hum sitaron ka Thikana chhoD dete hain

kahin rishton ke kamre mein wo KHud ko qaid na samjhen

so hum bahar nikalne ka bhi rasta chhoD dete hain

mohabbat mein kiya har ek wada yun nibhate hain

ki hum wade ki KHatir sari duniya chhoD dete hain

ziyaada raushni mein bhi dikhai kuchh nahin deta

tumhaari aankh khul jae andhera chhoD dete hain

ye daulat ghair ki hai sath to ja hi na paegi

to phir kis kaam ka hai ye KHazana chhoD dete hain

zaruri to nahin hai 'shad' har qissa mukammal ho

to apni is ghazal ko bhi adhura chhoD dete hai