ہم اپنی ذات کے اپنی انا کے قیدی ہیں

ہم اپنی ذات کے اپنی انا کے قیدی ہیں

دل و نظر کے دریچے وفا کے قیدی ہیں

جو ہو سکے تو عطا کر اڑان کی خواہش

ابھی قفس میں پرندے جفا کے قیدی ہیں

دھنک جبھی تو فلک پر دکھائی دیتی ہے

زمیں کے رنگ یہ سارے فضا کے قیدی ہیں

یہ جانتے ہوئے مٹی میں مٹی ہونا ہے

غرور کرتے ہیں جب کہ فنا کے قیدی ہیں

عجیب دور ہے مردہ ضمیر لوگوں کا

عجیب طور کے جرم و سزا کے قیدی ہیں

جو لوگ موت کے منہ سے بھی بچ نکلتے ہیں

یہ مان لو کہ وہ ماں کی دعا کے قیدی ہیں

یہ جن کی آنکھوں کی طغیانیاں نہیں رکتیں

فرات و دشت کے کرب و بلا کے قیدی ہیں

ربابؔ کس کو خبر ہے کہ کب بلاوا ہو

یہ بال و پر تو ازل سے قضا کے قیدی ہیں