hum aql pe ulfat mein bharosa nahin karte

ham aql pe ulfat meñ bharosā nahīñ karte

jab karte haiñ kuchh kaam to sochā nahīñ karte

ḳhud jāgte haiñ rakhte haiñ tāroñ ko bhī bedār

be-kār shab-e-hijr guzārā nahīñ karte

vo jin ko yaqīñ husn-e-daraḳhshāñ pe hai apne

kyuuñ dil ke añdhere meñ ujālā nahīñ karte

ham dekhte haiñ roz mah-o-mehr kā jalva

kis roz tire ruḳh kā tamāshā nahīñ karte

vo jin kī nigāhoñ meñ hai nāmūs-e-mohabbat

be-parda bhī ho koī to dekhā nahīñ karte

ġham kyā mutahammil jo nahīñ merī nazar ke

vo mere tasavvur se to pardā nahīñ karte

haiñ naam se 'maḳhmūr' ke mash.hūr-e-zamāna

go ham kabhī shaġhl-e-mai-o-mīnā nahīñ karte

hum aql pe ulfat mein bharosa nahin karte

jab karte hain kuchh kaam to socha nahin karte

KHud jagte hain rakhte hain taron ko bhi bedar

be-kar shab-e-hijr guzara nahin karte

wo jin ko yaqin husn-e-daraKHshan pe hai apne

kyun dil ke andhere mein ujala nahin karte

hum dekhte hain roz mah-o-mehr ka jalwa

kis roz tere ruKH ka tamasha nahin karte

wo jin ki nigahon mein hai namus-e-mohabbat

be-parda bhi ho koi to dekha nahin karte

gham kya mutahammil jo nahin meri nazar ke

wo mere tasawwur se to parda nahin karte

hain nam se 'maKHmur' ke mashhur-e-zamana

go hum kabhi shaghl-e-mai-o-mina nahin karte