hum aur un ke lutf-o-karam muddaton ke baad

ham aur un ke lutf-o-karam muddatoñ ke baad

zulmat huī hai nuur meñ zam muddatoñ ke baad

ab phir mashām-e-jāñ meñ sabā kā ḳhirām hai

kis ne kiyā hai jism pe dam muddatoñ ke baad

nikle haiñ kis kī āh-e-sahar-tāb ke tufail

zulf-e-shab-e-darāz ke ḳham muddatoñ ke baad

lauTā hai le ke zehn meñ āshob-e-zindagī

dil kā ġhazāl sū-e-haram muddatoñ ke baad

do-chār din kī baat nahīñ ai hujūm-e-shauq

miltā hai husn-e-jāh-o-hasham muddatoñ ke baad

yaḳh-basta fikr yaad kī āñchoñ se garm hai

bhaḌkā hai dil meñ sho.ala-e-ġham muddatoñ ke baad

'sibtain' shahr-e-ilm-o-adab ke nasīb meñ

hote haiñ ham se ahl-e-qalam muddatoñ ke baad

hum aur un ke lutf-o-karam muddaton ke baad

zulmat hui hai nur mein zam muddaton ke baad

ab phir masham-e-jaan mein saba ka KHiram hai

kis ne kiya hai jism pe dam muddaton ke baad

nikle hain kis ki aah-e-sahar-tab ke tufail

zulf-e-shab-e-daraaz ke KHam muddaton ke baad

lauTa hai le ke zehn mein aashob-e-zindagi

dil ka ghazal su-e-haram muddaton ke baad

do-chaar din ki baat nahin ai hujum-e-shauq

milta hai husn-e-jah-o-hasham muddaton ke baad

yaKH-basta fikr yaad ki aanchon se garm hai

bhaDka hai dil mein shoala-e-gham muddaton ke baad

'sibtain' shahr-e-ilm-o-adab ke nasib mein

hote hain hum se ahl-e-qalam muddaton ke baad