hum bhi piyen tumhein bhi pilaen tamam raat

ham bhī piyeñ tumheñ bhī pilā.eñ tamām raat

jāgeñ tamām raat jagā.eñ tamām raat

un kī jafā.eñ yaad dilā.eñ tamām raat

vo din bhī ho ki un ko satā.eñ tamām raat

zāhid jo apne roze se thoḌā savāb de

mai-kash use sharāb pilā.eñ tamām raat

ai qais be-qarār hai kuchh kohkan kī ruuh

aatī haiñ be-sutūñ se sadā.eñ tamām raat

tā sub.h mai-kade se rahī botaloñ kī maañg

barseñ kahāñ ye kaalī ghaTā.eñ tamām raat

ḳhalvat hai be-hijāb haiñ vo jal rahī hai sham.a

achchhā hai us ko aur jalā.eñ tamām raat

shab-bhar rahe kisī se ham-āġhoshiyoñ ke lutf

hotī raheñ qubūl duā.eñ tamām raat

daabe rahī paroñ se nasheman ko raat bhar

kyā kyā chalī haiñ tez havā.eñ tamām raat

kaaTā hai saañp ne hameñ sone bhī do 'riyāz'

un gesuoñ kī lī haiñ balā.eñ tamām raat

hum bhi piyen tumhein bhi pilaen tamam raat

jagen tamam raat jagaen tamam raat

un ki jafaen yaad dilaen tamam raat

wo din bhi ho ki un ko sataen tamam raat

zahid jo apne roze se thoDa sawab de

mai-kash use sharab pilaen tamam raat

ai qais be-qarar hai kuchh kohkan ki ruh

aati hain be-sutun se sadaen tamam raat

ta subh mai-kade se rahi botalon ki mang

barsen kahan ye kali ghaTaen tamam raat

KHalwat hai be-hijab hain wo jal rahi hai shama

achchha hai us ko aur jalaen tamam raat

shab-bhar rahe kisi se ham-aghoshiyon ke lutf

hoti rahen qubul duaen tamam raat

dabe rahi paron se nasheman ko raat bhar

kya kya chali hain tez hawaen tamam raat

kaTa hai sanp ne hamein sone bhi do 'riyaz'

un gesuon ki li hain balaen tamam raat