hum bhi to kabhi raunaq-e-bazar rahe hain

ham bhī to kabhī raunaq-e-bāzār rahe haiñ

bikne ke liye shauq se tayyār rahe haiñ

ham ne kabhī sūraj se ujālā nahīñ māñgā

ik chāñd se chehre ke talabgār rahe haiñ

dīvāne ko zanjīr kā kuchh ḳhauf nahīñ hai

ham vo haiñ jo zulfoñ meñ giraftār rahe haiñ

darkār nahīñ ham ko ye paimāna-o-sāġhar

ham āñkhoñ se piine ke gunahgār rahe haiñ

bhūle se kabhī un ko siyahkār na kahnā

jo log haqīqat meñ siyahkār rahe haiñ

maanā ki baḌe sahl haiñ tere liye ham log

duniyā ke liye uqda-e-dushvār rahe haiñ

har gosha-e-tārīk munavvar kiyā ham ne

har bazm meñ ham the jo ziyā-bār rahe haiñ

hum bhi to kabhi raunaq-e-bazar rahe hain

bikne ke liye shauq se tayyar rahe hain

hum ne kabhi suraj se ujala nahin manga

ek chand se chehre ke talabgar rahe hain

diwane ko zanjir ka kuchh KHauf nahin hai

hum wo hain jo zulfon mein giraftar rahe hain

darkar nahin hum ko ye paimana-o-saghar

hum aankhon se pine ke gunahgar rahe hain

bhule se kabhi un ko siyahkar na kahna

jo log haqiqat mein siyahkar rahe hain

mana ki baDe sahl hain tere liye hum log

duniya ke liye uqda-e-dushwar rahe hain

har gosha-e-tarik munawwar kiya hum ne

har bazm mein hum the jo ziya-bar rahe hain