hum bhi yaqin-e-wada-e-farda na kar sake

ham bhī yaqīn-e-vāda-e-fardā na kar sake

do din kī zindagī kā bharosā na kar sake

ehsāñ marīz-e-ġham pe masīhā na kar sake

achchhā yahī huā ki vo achchhā na kar sake

rānā.ī-e-ḳhayāl hameñ roktī rahī

mauqa bhī thā to arz-e-tamannā na kar sake

kuchh baat hai ki ham se mohabbat huī na tark

karnā bhī chāhte the to aisā na kar sake

zinda diloñ ko zinda-e-jāved kar dikhāo

vo kaam tum karo jo masīhā na kar sake

fursat hameñ milī na ġham-e-hijr-e-yār se

sāmān-e-imbisāt muhayyā na kar sake

apnā hī e.atibār nahīñ is jahān meñ

kaise kaheñ ki tum pe bharosā na kar sake

kaise bayāñ ho ham se kisī dil kī aarzū

ḳhalvat-nashīñ ko anjuman-ārā na kar sake

'sāqib' jahāñ meñ aa ke kiyā ham ne kyā agar

us jān-e-ārzū kī tamanna na kar sake

hum bhi yaqin-e-wada-e-farda na kar sake

do din ki zindagi ka bharosa na kar sake

ehsan mariz-e-gham pe masiha na kar sake

achchha yahi hua ki wo achchha na kar sake

ranai-e-KHayal hamein rokti rahi

mauqa bhi tha to arz-e-tamanna na kar sake

kuchh baat hai ki hum se mohabbat hui na tark

karna bhi chahte the to aisa na kar sake

zinda dilon ko zinda-e-jawed kar dikhao

wo kaam tum karo jo masiha na kar sake

fursat hamein mili na gham-e-hijr-e-yar se

saman-e-imbisat muhayya na kar sake

apna hi eatibar nahin is jahan mein

kaise kahen ki tum pe bharosa na kar sake

kaise bayan ho hum se kisi dil ki aarzu

KHalwat-nashin ko anjuman-ara na kar sake

'saqib' jahan mein aa ke kiya hum ne kya agar

us jaan-e-arzu ki tamanna na kar sake