hum chale jaenge phir haal tera kya hoga

ham chale jā.eñge phir haal tirā kyā hogā

ham na hoñge to tire ghar meñ añdherā hogā

phuul ke badle jo us shoḳh ne pheñkā hogā

dil kā ā.īna usī sang se TuuTā hogā

kis ko ehsās dilāne ko chale aa.e ho

kis ko is shahr meñ ab tum pe bharosa hogā

ab zarā soch-samajh kar hī sahārā DhūñDo

ḳhushk peḌoñ kā ye saaya bhī adhūrā hogā

log mahloñ meñ baseroñ ke tamannā.ī haiñ

merī taqdīr meñ miTTī kā gharauñdā hogā

phuul chun-chun ke to pathrā ga.iiñ āñkheñ apnī

kab kisī jhiil sī āñkhoñ kā nazārā hogā

mujh ko shohrat kī zarūrat nahīñ 'afsar-dakanī’

merī ġhazloñ kā har ik bazm meñ charchā hogā

hum chale jaenge phir haal tera kya hoga

hum na honge to tere ghar mein andhera hoga

phul ke badle jo us shoKH ne phenka hoga

dil ka aaina usi sang se TuTa hoga

kis ko ehsas dilane ko chale aae ho

kis ko is shahr mein ab tum pe bharosa hoga

ab zara soch-samajh kar hi sahaara DhunDo

KHushk peDon ka ye saya bhi adhura hoga

log mahlon mein baseron ke tamannai hain

meri taqdir mein miTTi ka gharaunda hoga

phul chun-chun ke to pathra gain aankhen apni

kab kisi jhil si aankhon ka nazara hoga

mujh ko shohrat ki zarurat nahin 'afsar-dakani’

meri ghazlon ka har ek bazm mein charcha hoga